NOVENA ALANG SA MGA KALAG SA PURGATORIO

NOVENA ALANG SA MGA KALAG SA PURGATORIO

Cebuano -Traditional

I. ROSARIO SA PASYON - Rosario alang sa mga Kalag

¡Ave Maria Purisima, sin peccado concebida!

MGA PASI-UNA'NG RITO:

L: (mag-krus sa agtang) Tungod sa timaan sa Santa Cruz… (mag-krus sa baba) Sa amo'ng mga kaaway… (mag-krus sa dughan) Bawi-on mo kami o Dios namo… (Manguros) Sa Ngalan sa Amahan, ug sa Anak ug sa Espirito Santo (Mateo 28:19).

R: Amen.

PASI-UNA'NG PAG-AMPO - PAGHINULSOL:

Ginoo kong Hesukristo, Dios ug Tawo nga Matuod, Magbubuhat ug Manunubos ko, tungod sa pagka-Dios Mo nahigugma ako Kanimo labaw sa tanan. Busa, nagabasol ako’g daku uyamut, naghinulsol ako sa ako'ng mga sala nga tanan. Sa bug-os ko'ng kasing-kasing nagasaad ako sa malig-on nga dili na makasala pag-usab, likayan ko na man ang mga kahigayunan sa pagpakasala. Mokumpisal ako ug motuman sa Penitensiya nga isugo Mo kanako. Ihalad ko man Kanimo ang ako'ng kinabuhi, mga buhat ug mga kabudlayan nga tanan, bayad nako sa ako'ng mga sala. Naglaum ako sa Imo'ng Diosnon nga kaayo ug kalooy nga walay katapusan. Pasaylu-on Mo ako tungod sa pagpasakit ug pagkamatay Mo sa Krus. Hatagan Mo ako sa Imo'ng Santos nga grasya nga ikabalhin ko sa ako'ng mga gawi, nga ikadayon ko pagtuman sa mga maayo'ng buhat kutob sa ikamatay ko. Amen.

AKTO SA PAGTUO, PAGLAUM, UG GUGMA - ACTO DE FE, ESPERANZA Y CARIDAD:

Mitoo ako Dios ko, nga Ikaw mao'y Dios nga Amahan, Dios nga Anak, ug Dios na Espirito Santo. Tulo ka personas nga gayod ug USA ra ka Dios nga matuod, maayo nga walay sinugdan ug katapusan, manggialamon, matarung, makagagahom, sinugdan ug katapusan sa nga tanan; mitoo ako nga ang atong Ginoong Jesu-Cristo mao'y Diyos ug tawo nga matuod nga gi-anak ni Santa Maria Birhen, gisakit sa sugo ni Poncio Pilato, namatay ug nabuhi, misaka sa langit, Mitoo ako nga moanhi pag-usab sa paghukom sa mga buhi ug sa mga minatay, mitoo ako nga ang lawas sa atong Ginoong Jesucristo anaa sa hostia sa Santisimo Sacramento sa altar. Ug mitoo ako sa tanan nga gipatohoan sa atong Inahan Santa Iglesya Katolika Apostolika Romana; kay ingon niana gipahayag mo Diyos ko, sa Santa Iglesya.

[Tulo ka Amahan Namo, Tulo ka Maghimaya Ka Maria, Tulo ka Requiem Eternam ug Tulo ka Gloria Patri]

AMAHAN NAMO (3x):

L: Amahan namo, ana-a Ka sa mga Langit. Pagdaygon ang Imo'ng Ngalan. Moabot kanamo ang Imo'ng ginghari-an. Matuman ang Imo'ng pagbuot, dinhi sa yuta maingon sa Langit.

R: Ang kalan-on namo sa matag adlaw, ihatag kanamo karong adlawa. Ug pasaylo-a kami sa amo'ng mga sala, maingon nga nagapasaylo kami sa mga nagkasala kanamo. Ug dili Mo kami itugyan sa mga pagsulay, hinono-a luwasa kami sa dautan. Amen.

.

.

.

MAGHIMAYA KA MARIA (3x):

L: Alang sa mga Birtudes sa Pagtuo, Paglaum ug Gugma…Maghimaya ka Maria, napuno ka sa grasya. Ang Ginoo ana-a kanimo. Bulahan ka sa mga babaye nga tanan. Ug bulahan man usab ang Bunga sa tiyan mo nga si Hesus.

R: Santa Maria, Inahan ka sa Dios, i-ampo mo kami'ng makasasala. Karon ug sa oras sa amo'ng ikamatay. Amen.

REQUIEM ETERNAM [PAHULAY NGA DAYON] (3x):

L: Ang Kapahulayang Dayon ihatag Mo [ka'ng (nga'an sa namatay)] sa mga kalag nga nitaliwan, O Ginoo.

R: Ug ang Kahayag nga Walay Pagkapalong modang-ag kanila/kaniya hangtud sa kahangturan. Amen.

GLORIA PATRI [HIMAYA SA AMAHAN] (3x):

L: Gloria Patri, et Filio, et Spiritui Sancto.

R: Sicut erat in princípio, et nunc, et semper, et in sæcula sæculórum. Amen.

PANGILABA:

Ibungat Mo, Ginoo, ang amo'ng mga ngabil, inita Mo ang amo'ng mga kasing-kasing, hawanan Mo sa tanang mga huna-huna nga mahugaw og walay pulos, hayagan Mo ang amo'ng salabutan ug pagdasigon Mo ang amo'ng kabubut-on aron sa tibook nga kasing-kasing pangadyeon namo kini'ng Santos nga Rosario, sa mga kaagi sa Imo'ng Santos nga pagpasakit ug pagpakamatay uban sa mga kasakit nga mapait sa iyang Santos nga Inahan, ang Mahal nga Birhen Maria ug dunggon kami sa diosnon Mo'ng kaambong nga mabuhi ug maghari sa walay katapusan. Amen.

.

.

.

On Our Father Beads:

1. Unang Misteryo, etc…

2.L: Maloloy-on uyamot nga Hesus, tan-awa sa Imo'ng mga mata, ang kalag [ni: nga'an sa namatay] sa amo'ng mga minahal sa kinabuhi ug sa tanang mga binunyagan nga namatay ka, tungod kanila, namatay ug gisakit Ka sa Krus.

.

.

.

On Hail Mary Beads:

1. L: Hesus ko, tungod niadto'ng daghanan nga singot ug dugo nga gisingot Mo didto sa Hetsemani.

1.1 R: Kaluy-an Mo Ginoo ang kalag ni (nga'an sa namatay).

1.2 R: Kaluy-an Mo Ginoo ang tanang nga Kalag sa Purgatoryo ilabi ang amo'ng gihandum karon nga gituyo namo sa pag-ampo.

2. L: Hesus ko, tungod sa pagtampaling sa Imo'ng halangdon nga nawong.

3. L: Hesus ko, tungod sa mabangis nga paghampak Kanimo.

4. L: Hesus ko, tungod sa pagpurong-purong Kanimo sa mga maidlot nga tunok.

5. L: Hesus ko, tungod sa pagpas-an Mo sa Krus sa Dalan sa Kalbaryo/Kapaitan.

6. L: Hesus ko, tungod sa Imo'ng Santos nga nawong nga napuno sa dugo nga gilarawan Mo sa panyo ni Santa Veronica.

7. L: Hesus ko, tungod sa bisti Mo nga napuno sa dugo nga sa dakung kapintas gihubo Kanimo sa mga tampalasan.

8. L: Hesus ko, tungod sa Imo'ng Santos nga Lawas nga gilansang sa Krus.

9. L: Hesus ko, tungod sa Imo'ng Santos nga mga tiil ug mga kamot nga gilagbasan sa mga maidlot nga lansang.

10. L: Hesus ko, tungod sa Imo'ng kilid nga nabuka sa pagbuno sa usa ka bangkaw nga giagayan sa dugo ug tubig.

REQUIEM ETERNAM:

L: Ang Kapahulayang Dayon ihatag Mo [ka'ng (nga'an sa namatay)] sa mga kalag nga nitaliwan, O Ginoo.

R: Ug ang Kahayag nga Walay Pagkapalong modang-ag kanila/kaniya hangtud sa kahangturan. Amen.

PAG-AMPO SA FATIMA:

O Hesus ko, pasayloa kami sa amo'ng mga sala. Luwasa kami sa kalayo sa impiyerno. Ug dad-a ang tanang kalag ngadto sa Langit, ilabi na kato'ng nagkinahanglan sa Imo'ng dako'ng kalooy ug panabang. Amen.

Buhata susama sa Una'ng Misteryo ang Ikaduha'ng Misteryo hangtud na sa Ikalima'ng Misteryo...

PAGHALAD:

Matam-is uyamot nga Hesus, tungod sa pagtubos Mo sa kalibutan, nagpasakit Ka sa Krus; nangamuyo kami Kanimo, nga tungod sa Imo'ng mapait uyamot nga mga kasakit, luwason Mo ang kalag ni [nga'an sa namatay] (tanang mga kalag sa Purgatorio ilabi na ang mga kalag sa amo'ng mga mahal sa kinabuhi ug kansang adlaw sa kamatayon nga gihandum sa niagi'ng mga adlaw, kagahapon ug karon). Sa mga kasakitan nga giantos nila ug papahulayon Mo sila sa Imo'ng himaya nga walay katapusan. Amen.

LITANYA ALANG SA MGA KALAG SA PURGATORIO

L: Ginoo, Kaloy-i siya/sila.

R: Ginoo, Kaloy-i siya/sila.

L: Kristo Kaloy-i siya/sila.

R: Kristo Kaloy-i siya/sila.

L: Ginoo, Kaloy-i siya/sila.

R: Ginoo, Kaloy-i siya/sila.

L: Kristo

R: Dungga siya/sila.

L: Kristo

R: Pamati-a siya/sila.

L: Dios Amahan sa Langit.

R: Kaloy-i siya/sila.

L: Dios Anak, Manunubos sa Kalibutan.

R: Kaloy-i siya/sila.

L: Dios Espiritu Santo.

R: Kaloy-i siya/sila.

L: Santa Trinidad, Dios nga Usa.

R: Kaloy-i siya/sila.

L: Santa Maria.

R: I-ampo mo siya/sila.*

Santa nga Inahan sa Dios,*

Santa nga Birhen sa mga Birhen,

Inahan ni Cristo,

Inahan sa Simbahan,

Inahan sa Kalo-oy,

Inahan sa Grasya sa Dios,

Inahan sa Paglaum,

Inahan nga Putli,

Inahan nga Wala Hilabti,

Inahan nga sa Sala Wala Mabuling,

Inahan nga Buotan,

Inahan nga Takus Dayegon,

Inahan sa Kanunay'ng Panabang,

Inahan sa Magbubuhat,

Inahan sa Manluluwas,

Birhen nga sa Kaalam Walay Ingon,

Birhen nga Gitahud Namo,

Birhen kansa'ng Kadayganan Giawit Namo,

Birhen nga Gamhanan,

Birhen nga Maloloy-on,

Birhen nga Matuohon,

Salamin sa Katarungan,

Lingkuranan sa Kinaadman,

Hinungdan sa amo'ng Kalipay,

Kalis sa Espiritohanon,

Kalis sa Kadungganan,

Mabulokong Kalis sa Paghalad,

Rosa Mistika,

Torre ni David,

Torre nga Tipusa,

Balay nga Bulawan,

Arka sa Kasabotan,

Ganghaan sa Langit,

Bitoon sa Kabuntagon,

Kaayohan sa mga Masakiton,

Dalangpanan sa mga Makasasala,

Konsuylo sa mga Migrantes,

Maglilipay sa mga Nanagsubo,

Hinabang sa mga Kristiyanos,

Hari sa mga Angheles,

Hari sa mga Patriyarka,

Hari sa mga Propeta,

Hari sa mga Apostoles,

Hari sa mga Martires,

Hari sa mga Kompesores,

Hari sa mga Birhen,

Hari sa mga Santos,

Hari nga Gipanamkon sa Walay Sala nga Panulondon,

Hari nga Gidala sa Langit,

Hari sa Santos uyamot nga Rosaryo,

Hari sa Pamilya,

Hari sa Kalinaw,

L: Kordero sa Dios nga nagawagtang sa sala sa kalibutan.

R: Pasayloa siya/sila, Ginoo.

L: Kordero sa Dios nga nagawagtang sa sala sa kalibutan

R: Pamatia siya/sila, Ginoo.

L: Kordero sa Dios Nga nagawagtang sa sala sa kalibutan

R: Kaloy-i siya/sila, Ginoo.

L: Pasakop kami sa imo'ng panabang, Santa nga Inahan sa Dios. Dili mo biyaan ang amo'ng mga paghangyo kanimo diha sa amo'ng mga kinahanglan. Luwason Mo kami Ginoo sa tanan namo'ng mga katalagman. O Birhen sa gihapon nga mahigugmaon ug bulahan. I-ampo mo kami Santa nga Inahan sa Dios.

R: Aron mahimo kami'ng takos sa pagdangat sa mga gisaad sa’tong Ginoong Jesukristo. Amen.

MAG AMPO KITA:

Nagatugyan kami Kanimo, Ginoo, sa mga kalag sa Purgatorio ilabi na sa kalag ni [nga'an sa namatay] (sa mga kalag sa amo'ng mga mahal sa kinabuhi ug sa mga gihandum sa mga niaging adlaw, kagahapon ug karon), aron kun patay na sila sa kalibutan tungod sa Imo'ng kalo-oy nga walay katapusan, pasaylo-on Mo ang mga sala nga ila'ng nabuhat ug mabuhi unta sila uban Kanimo sa walay katapusan. Amen.

L: Requiem aeternam dona eis, Domine.

R: Et lux perpertua, luceat eis.

II. NOVENA (Propers)

ORASYON SA ADLAW NGA TANAN: O matam-is uyamot nga Hesus! Nga gilansang ka niana'ng Krus! Ikaw man ang Amahan nga maloloy-on; gamiton Mo kanako ang imo'ng daku'ng kalooy kay ako ang labing talamayon ug makalolooy nga makasasala, tungod sa Imo'ng Santos uyamot nga pagpasakit, tan-awa ang ako'ng kalag sa mga mata nga mahinuklogon ug ang tanang mga kalag sa Purgatoryo; ug tungod sa mga kasakit ug kapaitan sa imo'ng diosnon nga Inahan. Inahan nga maloloy-on uyamot ug dalangpanan sa mga makakasala, tugutan mo ako sa usa ka matuod nga kasakit sa akong mga sala ug luwason mo ang mga kalag sa Purgatoryo niadtong mga kasakit; tagaan mo sila sa himaya nga gisaad mo kanila nga pahulayan. Amen.

ORASYON SA UNA'NG ADLAW: Manunubos ko, Gugma sa kalag nga putli tungod sa kasakit ug pagpailob Mo sa paglansang Kanimo sa Krus, palagbasan Mo ang ako'ng kalag, sa lansang sa Santos nga kahadlok Kanimo, ug agakon Mo ako sa dalan sa Imo'ng Diosnon nga mga sugo. Nagahapa ako sa Imo'ng mga tiil, ug nagasimba ako Kanimo, matam-is uyamot nga Hesus, tungod sa kasakit nga gibati sa Imo'ng masulob-on nga Inahan; nangamuyo ako Kanimo, nga luwason Mo ang mga kalag sa Purgatoryo, sa ilang mga kasakitan ug dad-on Mo sila sa pahulayan nga walay katapusan sa himaya. Amen.

[Kini'ng pag-ampo nga mosunod pangadyeon sa adlaw-adlaw sa tapos ang Oracion nga paga-ilisan sa matag-adlaw...]

ORASYON: O maayo nga Hesus, Hari sa himaya! Luwason Mo ang mga kasakitan sa Purgatoryo, ang mga kalag sa mga minatay, luwason Mo sila Ginoo, sa mga kaguol ug mga kasakit nga gibati nila tungod sa gibati Mo sa kalbaryo ug sa Imo'ng masulob-on nga Inahan. Busa sa pagtabang kanila, ihalad namo Kanimo, Dios ko, ang amo'ng mga pag-ampo, mga pagpenitensiya ug panghupaw, uban sa usa ka matuod nga paghinulsol sa amo'ng mga sala. Dawaton Mo Ginoo kini'ng amo'ng pag-ampo ug tuguti nga si San Miguel Arcanghel nga gitudlo Mo sa mao'ng opisyo, moadto na aron pagkuha sa mga kalag nga bulahan didto sa kangitngitan sa kasubo ug sa mga kasakit ug magdala kanila ngadto sa kahayag ug kalipay sa himaya nga walay katapusan. Amen.

ORASYON SA IKADUHA'NG ADLAW: O kamot nga tuo sa Mamamawi, kamot sa mga pinili! O! Pila ang giunongan Mo sa pagtubos sa mga makakasala nga naglansang Kanimo nianang Krus; Magpuyo ka gihapon Dios ko, sa ako'ng tuo sa adlaw sa paghukom, tungod sa pagpasakit nga giantos Mo ug sa gibati sa Imo'ng masulob-on nga Inahan, buhat nga kaugalingon sa kamot, kaloy-an Mo sa daku'ng hinuklog ang mga kalag sa Purgatoryo, Kay nalooy Ka da pagpili kanila sa grasya, ihatag Mo na ang bunga sa pagkapinili, ang himaya nga walay katapusan. Amen.

ORASYON SA IKATULO'NG ADLAW: Matam-is uyamot nga Hesus, kon ang Imo'ng kamot nga wala bisan diosnon, ingon sa tuo nahatudlo sa mga pinilian ug sila makondenar man, nagasimba ako sa Imo'ng halangdon nga katarungan ug nagakurog sa kahadlok nga ako maoy usa ka pinilian tungod sa kadaghan ug kadagko sa ako'ng mga sala; nangamuyo ako Kanimo nga balhinon Mo unta gikan sa wala ngadto sa tuo, kay midangap ako gikan sa kaligutgut sa Imo'ng katarungan ngadto sa katam-is sa Imo'ng kalooy ug tungod sa mga kasakit sa Hari sa mga Angheles, nga ang Iya'ng mga matuod nga debotos dili gayod mahimong pinilian, naga-ampo ako Kanimo, sa daku'ng pagpaubos nga paadtuon Mo na sa langit ang mga kalag sa Purgatoryo gikan sa kahago ngadto sa pahulayan sa himaya nga diha magadayeg sa Imo'ng mga kalooy sa walay katapusan. Amen.

ORASYON SA IKA-UPAT NGA ADLAW: Hesus nga mahigugmaon uyamot, kon ang mga hampak mao'y kastigo sa mga ulipon ug labi pa gayod sa mga makasasala nga nahimo na sila nga ulipon sa yawa, ngano ikaw nga tag-iya sa mga kabubut-on gitan-aw karon nga wala nay dagway tungod sa mga hampak? Ay pagkawalay ulaw ko! Ug ngano'ng gibayran Mo sa Imo'ng putli uyamot nga lawas ang mga sala nga talamayon sa akong lawas? Nagasaad ako Ginoo pagbuhat sa matuod nga penitensiya ug pagsakit sa ako'ng mga kailibgon, tungod niini, uban sa mabangis nga mga hampak nga giantus Mo didto sa ga-iran, ihalad ko Kanimo, sa pagtabang sa mga kasakitan nga giantos sa Imo'ng mahigugmaon nga inahan, niini'ng agi nga labing maka-uulaw, dawaton Mo kini'ng kabubut-on ko nga mao ang paghigugma kanimo sa gihapon ug pagsilbi kanimo. Amen.

ORASYON SA IKALIMA'NG ADLAW: Ang mga makasasala nagapurong-purong sa mga bulak, ug ikaw bulak nga matahom ug labing pinili nga Nazareno, gikoronahan sa mga tunok? O! Kanang korona mahapatik pa unta sa ako'ng ulo, aron masabot ko tungod kaniya ang pagpalabi-labi ug ang tanan nga nagkalain-lain nga mga dautang huna-huna! Oh! Kon mahaluna pa unta sa ako'ng konsensya ang usa lamang ka tunok, ug dili magpahulay kanako hangtod nga mag-usab ako sa kinabuhi. Dili na ako buot Dios ko, niini'ng kalibutan ug purong-purong nga bulak kon dili sa mga tunok nga milapos sa Imo'ng Santos uyamot nga Inahan, ug Inahan ko man usab nga maloloy-on uyamot; tugotan Mo ang mga kalag sa Purgatoryo sa korona nga dili malaya sa himaya, Amen.

ORASYON SA IKA-UNOM ADLAW: Ginoo, ngano'ng nag-ula Ka sa mga mapait nga luha didto sa Krus? Ug ako wala mag-ula bisan usa na lang ka tulo nga luha tungod sa ako'ng mga sala? Ay! Dios ko, pagkabuta ko, pagkalayo sa pag-ila ko kun unsay kadautan ug kalaw-ay sa pagbulag ko Kanimo! Hayagan mo ako maayo nga Jesus. Kay ikaw man ang kahayag sa kalibutan ug mando sa mga masayop! Tungod sa Imo'ng mga luha ug sa Imo'ng masulob-on nga Inahan, humoka ang ako'ng kasing-kasing, ug tagaan Mo ako sa mga luha sa contricion, kon nagatinguha na ako sa dili pagbalik sa ako'ng mga sala uban sa luha nga dugo, pahiran Mo ang masulob-ong luha sa mga kalag sa Purgatoryo, paambiton Mo sila sa kalipay sa Imo'ng diosnon nga naw'ng didto sa gingharian nga langitnon. Amen.

ORASYON SA IKAPITO'NG ADLAW: Kun tungod sa kauhaw Mo Ginoo sa kaluwasan sa mga kalag, maangkon pa unta nako ang ako'ng kaluwasan! Ay! Manunubos ko! Unsa unta ang pag-angkon ko sa mga birtudes ingon sa ako'ng mga bisyo ug mga sala karon ingon nga ania lamang kanako ang mga bisyo ug mga sala? Giangkon Mo lamang ang kapaitan ug dili ka buot sa kalipay tungod sa labihan nga paglapas sa akong baba ug walay paghawid sa ako'ng dila, ibutang Mo maayo nga Jesus, ibutang Mo ang paghilom nga maambong sa Imo'ng masulob-on nga Inahan nga wala gayod buk-a ang iyang mga ngabil, nag-antos siya sa usa ka walay katapusan nga kasakit, pagnga na ang kauhaw nga dako sa mga kalag sa Purgatoryo; kauhaw sa pakigkita Kanimo, Paghari uban Kanimo sa wala nay katapusan. Amen.

ORASYON SA IKAWALO'NG ADLAW: Matam-is uyamot nga Hesus, unsa nga mga kabudlay nga arang ko'ng ikamahay kun palandungon ko nga ikaw nag-antos diha sa Krus nga gibiyaan? Ug gipasagdan ka sa Dios nga Amahan nga nag-antos ingon ug dili ikaw anak Niya; ug ang pagtan-aw nga mahinuklogon sa Imo'ng masulob-on uyamot nga Inahan, nakapadugang sa Imong mga kasakit. O! panig-ingnan nga maka-uulaw sa ako'ng walay pagpa-ilob sa mga kahago, ipadala kanako, Ginoo, ang mga kakapoy nga makapahimuot Kanimo, apan sa pag-antos ug pagpailob nga mao'y dalan nga matuod sa langit. Tungod sa daku'ng pagbiya nga gibati sa Birhen nga ulay sa paghingutas Mo sa atubangan sa iya'ng mga mata. Pag-ubanon Mo ako batok sa tanang mga panulay 'ning, kinabuhi, pag-ubanan Mo ako sa takna sa kamatayon, ug tungod niadto'ng mao'ng pagbiya, paga-ubanan Mo ang mga kalag sa Purgatoryo nga sa Imo'ng pag-uban ug pag-tabang sa Birhen Maria milaom sila pag-pakita Kanimo sa Imo'ng Diosnon nga naw'ng didto sa himaya. Amen.

.

ORASYON SA IKASIYAM NGA ADLAW: O bangkaw nga mabangis! Nga giablihan mo ang kilid sa mamamawi! Nga patay na. O pagkatam-is ug pagkamahigugmaon mo kanako, giablihan mo ako sa puerta sa sudlanan nga masayon sa matam-is uyamot nga kasing-kasing ni Hesus! O kasing-kasing ni Hesus! O kasing-kasing ni Maria nga gisamaran niadto'ng makahahadlok nga bangkaw, ibta ang ako'ng kasing-kasing ug iipon sa inyo'ng kasing-kasing aron mahimo unta nga usa ka kasing-kasing nga maligdong, usa ka kasing-kasing nga mapaubsanon, usa ka kasing-kasing nga matunaw unta sa gugma sa Dios, ug sa isigkatawo, ug mahinuklogon kaayo sa mga kalag sa Purgatoryo ug sa uban pang kinahanglan nga sa mga buhat magpahayag ako sa paghinuklog sa pagtan-aw kanila. Nasakit ako sa tibuok ko'ng kasing-kasing matam-is nga Hesus, nahagugma ako kanimo, nga lipayon Mo na ang mga kalag sa Purgatorio nga nagapanghupaw na sila ug daku sa pag-adto sa langit, lipayon Mo na sila Amahan sa kalooy ug Dios sa nga tanan nga kalipay; tungod sa putli uyamot nga kasing-kasing ni Maria nga mao ikaw gihapon ang kalipay sa ako'ng kasing-kasing, nasakit ako ug nasakit pa sa pagtamay kanimo samtang nabuhi ako kay ikaw man ug ikaw gihapon ang Jesus sa ako'ng kasing-kasing. Amen.

III. GOZOS

Ay, tawo nga manggiloy-on

ug amo'ng gilauman.

SA LANGUB AMONG GIPUY-AN

INYO KAMING PANABANGAN.

Ay! Miagi na kami

Niana'ng walog nga luhaan

'Ning tabang kami sa uban,

Ug kanamo walay motabang?

Dili ninyo hikalimtan,

Nga magabalos babaslan.

SA LANGUB AMONG GIPUY-AN

INYO KAMING PANABANGAN.

Gilibutan man kami

Sa kasakit nga daghanan,

Sa kalayo nga masiga.

Ug dili gayud mapagngan

Kay gihuyup kanunay

Sa Diosnon nga kinaadman.

SA LANGUB AMONG GIPUY-AN

INYO KAMING PANABANGAN.

Ang mga sala'ng diyutay,

Amo nga gipasipad-an,

Sa wala'y pagtagam gayud

Nga ingon nga batasan,

Nahimo kami'ng takus

'Ning amo nga puloy-anan.

SA LANGUB AMONG GIPUY-AN

INYO KAMING PANABANGAN.

Ang lima ka balatian

Nga dayandayan sa lawas

ug gigamit sa tawo

Sa iya'ng kasal-anan,

Gisakit ug dako dinhi

Balus sa gikalipayan.

SA LANGUB AMONG GIPUY-AN

INYO KAMING PANABANGAN.

Ang labi'ng daku'ng pag-antos

Niini'ng pagkabutanga,

Dili ang kadugay lamang,

Sa pag-atubang sa Dios

Nga amo'ng gikahidlawan.

SA LANGUB AMONG GIPUY-AN

INYO KAMING PANABANGAN.

Kalimot nga wala'y ingon,

Ang sa mga kaubanan

Nahiagum lamang sila

Sa amo'ng gikabudlayan,

Sa wala nila'y pagpalandong

Sa ila'ng katigulangan.

SA LANGUB AMONG GIPUY-AN

INYO KAMING PANABANGAN.

Ang kalooy nga buhat

Maoy amo'ng gikinahanglan

Sa pag-ampo ug sa Misa

Inyo kami'ng kahalaran,

Walay laing tambal

Kristiyanos niini nga kalisdanan.

SA LANGUB AMONG GIPUY-AN

INYO KAMING PANABANGAN.

Pulong man ni Hesukristo

Nga ang Langit nga dalan,

Masigpit nga wala'y ingon

Ug sa tagsa ra gilaktan,

Nan kaloy-i kami ninyo,

Kay sa Dios kamo babaslan.

SA LANGUB AMONG GIPUY-AN

INYO KAMING PANABANGAN.

Ang inyo nga kinabuhi

Ingon ug hangin nga mawala.

Ug ang kalipay sa yuta

Daw aso nga moagi lamang.

Tumanon ninyo ang kalooy

Aron sa ulahi baslan.

SA LANGUB AMONG GIPUY-AN

INYO KAMING PANABANGAN.

Ay, tawo nga manggiloy-on

ug amo'ng gilauman.

SA LANGUB AMONG GIPUY-AN

INYO KAMING PANABANGAN.

L: Audivi vocem de coelo dicentem ei.

R: Beati mortui qui in Domino moriuntur.

OREMUS: Deus, Veniae largitor, et humanae salutis amator quaesumus dementiam tuam ut nostrae congregationis, fratres propinquos et Benefactores qui ex hoc saeculo transierunt Beate Mariae semper virgine intercedente cum omnibus sanctis tuis ad perpetuae beatitudines consortium pervenire concedas. Fideiium Deus omnium conditor et Redemtor animabus famulorum famularumque tuarum remissionem cunctorum tribue peccatorum ut indulgentiam quam semper optaverunt piis suplicationibus consequantur. Qui vivis et regnas in saecula saeculorum. Amen.

IV. CREDO SA MGA APOSTOLES

Nagatoo ako sa Dios nga Amahan,

Makagagahum sa tanan.

Magbubuhat sa Langit og sa Yuta.

Nagatoo ako kang Jesukristo

iyang bugtong anak nga atong Ginoo,

gipanamkon siya sa lalang sa

Espiritu Santo, Ug Natawo gikan ni Maria nga

Ulay, Gisakit siya sa sugo ni Poncio Pilato,

Gilansang sa krus, Namatay ug Gilubong. Miadto

siya sa mga Nangamatay ug sa ikatolo ka adlaw

nabanhaw siya. Misaka sa Langit, ug nagalingkod

sa too sa Dios Amahan, Makagagahum sa tanan.

Gikan Didto Mobalik siya aron Paghukom sa mga

Buhi ug sa mga Minatay. Nagatoo ako sa Espiritu

Santo. Sa santos ug Katoliko nga Simbahan, sa

Panag-ambit sa mga Santos, sa Kapasayloan sa

mga sala, ug sa Pagkabanhaw sa Lawas ug sa

Kinabuhing Walay Katapusan.

Amen.

V. SALVE REGINA - Maghimaya Ka Reyna

Maghimaya ka Rayna, Inahan sa kaluoy ug kinabuhi,

Kinatam-is ikaw ang gi-lauman namo, Maghimaya Ka!

Nagapanawag kami kanimo,

Kaming mga hininginlang anak ni Eba,

Nagapanghupaw kami, Nanag-agulou, nanagpanghilak,

Dinhi niining walog nga luhaan.

Dad-a ang among mag-alampo,

ipakita mo kanamo kanang imong ga mata nga maloloy-on

Kon tapos na kining paghingilin ipakita mo kanamo

Ang imong Anak nga si Hesus,

Ang Mahal nga Bunga sa tiyan mo.

Ay maaghop!, Ay maluluy-on,

Ay matam-is nga Birhen Maria!

VI. MEMORARE (Hinumdoman)

Hinumdoman mo O mahimayaon uyamot nga Birhen Maria, nga wala pa gyud dungga nga may usa nga midangop sa imong panalipod, nangayo sa imong panabang ug pangaliya sa pagpangama nga imong gibiyaan. Dinasig niining pagsalig, nagadangop kami kanimo O Ulay sa tanang mga ulay, among Inahan, kanimo kami miduol sa imong atubangan, ania kami puno sa kasal-anan ug kasubo.

O Inahan sa Dios, ayaw tamaya ang among pangaliya, hinono-a luwasa kami ug ihatag ang among pangamuyo. Amen.

VII. PAG-AMPO NGADTO KA'NG SAN MIGUEL ARKANGHEL

San Miguel Arkanghel, tabangi kami sa panggubatan, panalipidi kami batok sa mga panlimbong ug pagsulay sa yawa. Mapa-ubsanon kaming nagahangyo kanimo, o Prinsipe sa mga kasundaluhan sa Langit nga pinaagi sa gahom sa Dios, imong gibanlod sa impierno si satanas uban sa iyang dautang mga espiritu nga naglibot-libot sa kalibutan aron pagpukan sa among mga kalag. Amen.

¡Ave Maria Purisima, sin peccado concebida!

¡Ave Maria Purisima, sin peccado concebida!

¡Ave Maria Purisima, sin peccado concebida!

¡Ave Maria!

(Manguros)